Байгалийн үзэсгэлэнт газар: Хасагт хайрхан уул Говь-Алтай аймгийн Шарга, Жаргалан, Баян-Уул , Тайшир сумдын нутагт Их нуруудын хотгор руу гүн түрж орсон Алтайн салбар уулсын нэг билээ. Энэ уулын буга, аргаль, янгир, ирвэс зэрэг ховор ан амьтдын өлгий нутаг бөгөөд байгалийн үзэсгэлэнт байдлыг хамгаалах зорилгоор 1965 онд АИХ-ын Тэргүүлэгчдийн 17 дугаар зарлигаар дархан газар болгосон. Улсын туснай хамгаалалттай газрын ангиллыг шинэчлэн тогтоох тухай УИХ-ын 1995 оны 26 дугаар тогтоолоор дархан цаазат газрын ангиллаар баталгаажуулсан. Талбайн хэмжээ 27448 га. Эгц цавчим хажуутай, хурц шовх оргилтой 2 зэрэгцээ нуруунаас бүрдэх бөгөөд хойт талыг Хасагт Хайрханы нуруу, өмнө талыг Гурван богдын нуруу гэнэ.